เรื่องมีอยู่ว่าข้าเจ้าย้ายมายะก๋านที่ เมืองกรุง มีอยู้วันนึ่ง ข้าเจ้ากึ๊ดใจ๋ไค้อยากกิ๋นขนมเส้นน้ำเงี้ยว ไปหาซื้อมากิ๋น ร้านใดกะดาย มันตึงบะถูกปากสักตี้ ข้าเจ้ากะเลยมาเซาะหาวิธีการทำในเน็ต แล้วโทรถามอิแม่ตี้บ้าน ว่าเปิ้นยะจ๊ะใดกั๋น  เริ่มเลยละกันนะจ้าว

ส่วนผสมพริกแกง (ตามใจข้าเจ้า)
1.พริกแห้ง เอาเม็ดตางในมันออกแล้วแจ้น้ำสัก 20 นาที
2.ข่า
3.ขมิ้น เอามาซอยเป็นแว่น สักแง่งนึง
4.จ๊ะใค หรือตะใคร้ เอามาซอยเป็นแว่น
5.เกลือป่น
6.ฮากผักชี
7.หอมขาว หรือ กระเทียม
8.หอมแดง
9.อันนี้ขาดบะได้เน้อ ถั่วเน่า เอาถั่วเน่าไปย่างไฟจ๋นหอม อิแม่บอกว่าถ้าบะมีหื้อใส่กะปิเผาแตนเน้อ




ส่วนผสมน้ำเงี้ยว (ตามใจข้าเจ้าเหมือนกัน มักอันใด ใส่อันนั้นนักๆ)
1.ดอกงิ้ว หื้อเอาไปแจ้น้ำสักกึ่งชั่วโมงจ๋นมันอ่อน
2.เลือดก้อน เอามาซอยเป๋นสี่เหลี่ยม (ต้องเอาเลือดหมูตะอั้นนะ)
3.มะเขือส้ม จะเอาแก่นใย๋ หรือแก่นน้อย ตามใจ๋คนยะเลยจ้าว
4.กระดูกหมู (ต้องเอาซื่โครงตะอั้นเน้อ ถึงจะลำ)
5.หมูสับ ใส่น้อยเดวนะ สัก 1 ขยุ้มมือปอล่ะ
6.ขาดบะได้แหมอย่างกะคือ ขนมเส้น






อันนี้ฮูปพริกแกงตี้ต๋ำเสดแล้ว (กว่าจะยะแล้ว ก้ามแขนข้าเจ้าขึ้นพอด)



วิธีการทำ ง่ายขนาด
ถ้าต๋ำพริกแก๋งเสดแล้ว กะตั้งหม้อเลย เตรียมน้ำป่าวไว้โตยเน้อ เดวก้นหม้อจะใหม้
หื้อเอาพริกแกง ซี่โคงหมู แล้วก่อ หมูสับที่เตรียมไว้ มาคั่วพร้อมกันในหม้อเลย เอาจ๋นหมู๋ใกล้สุก ระหว่างคั่วหมูกับน้ำพริก กะหื้อสังเกตก้นหม้อดีๆ แล้วใส่น้ำลงไปทีละน้อย เพื่อบะหื้อหม้อไหม้  (ขั้นตอนนี้เตียมผ้าปิดจมูกไว้เลยเลยกะดี มันตึงจ๋าม ตึงไอ 555++)

ถ้าหมูใกล้สุก หื้อเติมน้ำลงไปเลย  รอน้ำเดือด หื้อใส่ดอกงิ้วลง ตั้งไว้สักกำกะเอาเลือดหมู กับมะเขือส้มลงตวยไปเลย แล้วก่อปรุงรสได้ตามใจ๋เลยจ้าว

ถึงขั้นตอนนี้กะนั้งเฝ้าหม้อไปตวย ลืนน้ำลายไปตวย



เป็นอันเสดพิธีทำน้ำเงี้ยว ได้กินจ๋นหนำใจ๋แล้วกำนี่
ฮูปที่ถ่าย ออกมาบะใค่งามตะได เพราะว่ายะไป ถ่ายไป บะดีว่ากั๋นเน้อจ้าวว

อันนี้ภาพถ่ายโดยรวมจ้าว (ฮูปมันอาจจะซ้ำกันไปหน้อย กะขออภัยโตยเน้อจ้าวว)