ตอนที่ 60 อาหารอีสาน

เมนูที่  46 หมกเสือ









มาแล้วครับผมแล้ว บักอ้ายหน้ามนคนเก่า กลับมาพ้อพี่น้องอีกแล้ว
ผ่านร้อนผ่านหนาวผ่านฝน ผ่านคนทั้งด่าทั้งชม ฝ่าฟันมาจนถึงตอนที่ 60 จนได้
สำหรับตอนนี้จะเลยสิจัดให้พิเศษขึ้นมาแน่จักหน่อยหนึ่ง
เพื่อเป็นการขอบคุณทุกกำลังใจเนาะครับ



ที่ว่าพิเศษนั้นกะ เป็นเพราะว่า รายการอาหารที่บักอ้ายที่นำเสนอในมื้อนี้
ถือได้ว่าพิเศษอย่างที่สุด
เพราะมันคือ
หมกเสือ
ครับพี่น้องชาวไทย




ก่อนอื่นกะต้องขออธิบายก่อนว่า หมกเสือ
บ่ได้เฮ็ดมาจากเนื้อ เสือ แต่ประการได๋
หากแต่เฮ็ดมาจากเนื้องัว ส่วนที่เฮาเอิ้นว่า “เสือร้องไห้”
จังเป็นเป็นที่มาของชื่อแนวกิน “หมกเสือ”
แต่ถ้าหากผู้ได๋บ่กินเนื้องัว กะสามารถใช้เนื้อหมูแทนได้คือกัน
มื้อนี้บักอ้ายกะใช้เนื้อหมู ส่วนที่มีมันติดแทนคือกัน
เพราะว่าบักอ้ายบ่กินเนื้องัวนั่นเอง




บัดทีนี้กะมาเบิ่งส่วนผสมของหมกเสือกันเนาะครับ
เนื้องัว ส่วนเสือร้องไห้  หรือว่าเนื้อหมูติดที่มีมันติด
ใบโหระพา
น้ำซุป


ส่วนผสมของเครื่องแกงหมกเสือ
บักพริกดิบ
กระเทียม
หอมแดง
ใบบักกรูด
ตะไคร้
ข่า
พริกไทยเม็ดขาว
(อัตราส่วนกะใส่ตามความมักโลด)






ส่วนผสมของน้ำซุป
กระดูกหมู
เกลือ
น้ำ







สุดท้ายคือเครื่องปรุง
มีซอสปรุงรสอย่างเดียวโดดๆ








ส่วนวิธีเฮ็ดกะง่ายๆ
เริ่มจากเอากระดูกหมูมาต้มน้ำซุปเอาไว้ก่อน
ต้มประมาณ 2 ชั่วโมง เติมเกลือจักหน่อยให้ได้รสชาติ







หลังจากได้น้ำซุปแล้ว
กะเอาเครื่องแกงมาตำ ตำให้พอแหลกกะพอ
บ่ต้องละเอียดคักดอก ตำแล้วกะตักขึ้นมาพักเอาไว้สาก่อน










เอาเนื้องัวหรือว่าเนื้อหมูมาหั่นเป็นต่อนๆให้พอดีคำ
โหระพาเอามาเด็ดเอาแต่ใบ







แล้วเอาน้ำซุปมาใส่หม้อ ท่าให้น้ำซุปเดือด เอาพริกแกงลงไป
ท่าให้เดือด ค่อยเอาเนื้องัวหรือว่าเนื้อหมูใส่
ปรุงรสด้วยซอสปรุงรส ซิมเบิ่ง พอได้รสชาติตามที่เฮามัก
เอาใบโหระพาใส่ลงไป ยกหม้อลงจากเตา









แค่นี้ หมกเสือ กะพร้อมเสริฟแล้วล่ะ
ป้าด!!! ลืมบ่ลงอีหลีเด เมนูนี้