ตอนที่ 50 อาหารอีสาน

เมนูที่ 39 ส้มหมูต่อน





วันเพ็ญเดือนสิบสอง น้ำนองเต็มตลิ่ง
เราทั้งหลายชายหญิง
สนุกกันจริง วันลอยกระทง

ลอย ลอยกระทง ลอย ลอยกระทง
ลอยกระทงกันแล้ว
ขอเชิญน้องแก้วออกมารำวง





สิเอิ้นหาสิแตกอีหยัง คนกำลังรำวงแม้!!

เสียงหมู่บักอ้ายเอิ้นขึ้น บักอ้ายย่างออกมาจากลานรำวงอย่างหัวเสีย

นั่นกะเป็นแค่จินตนาการขอบักอ้ายเนาะ

ความจริงแล้ว วันลอยกระทงปีนี้บักอ้ายดันติดงานอยู่ในกรุงเทพ บ่ได้กลับหนองบัว

ทั้งๆที่อยากสิกลับใจสิขาด เพราะว่าอยากกลับไปเบิ่งซุปเปอร์อีเกิ้ง

ที่เข้ามาใกล้โลกที่สุดในรอบ 68 ปี

คันเบิ่งจากท้องนาบ้านบักอ้าย คือสิเห็นดวงใหญ่คักขนาด

แต่กะจั่งว่านั่นล่ะ มันไปบ่ได้อีหลี



พอดีมีคนใจดีเพิ้นกะเลยโทรมาบอกว่า เดี๋ยวเลิกงานแล้วเพิ้นสิขับรถพา

ไปเบิ่งอีเกิ้งที่แม่น้ำบางประกงว่าสั่น (ป้าด!!คือมาทั้งหล่อทั้งใจดีหลายแท้)



เวลาทุ่มหนึ่งเพิ้นกะมาฮับบักอ้ายอีหลี อีเกิ้งดวงใหญ่กะขึ้นให้เห็นพอได้ดีใจ

แต่พอขับรถไปเรื่อยๆ เมฆก้อนบักใหญ่กะลอยมาบังอีเกิ้งจนหมด

แห่งขับรถไปใกล้แม่น้ำบางประกงท่อได๋ กะแห่งมืดลงท่อนนั่น

พอขับรถไปฮอด กะออกมานั่งท่าเบิ่งอีเกิ้ง ปรากฏว่าอีเกิ้งมันอยากอาย

มันเลยบ่โผล่หัวออกมาให้เห็นอีกเลย

ต้องท่าอีกจักปีล่ะบัดนี้ จั่งสิได้เบิ่ง สิอยู่ถึงบ่





เอ้า นอกเรื่องมาโดนแล้ว กะมาเข้าเรื่อง แนวอยู่แนวกินของเฮาจักเทื่อเนาะ

สำหรับตอนนี้บักอ้ายสินำเสนอ เมนูง่ายๆ แต่ว่าแซ่บคักขนาด

นั่นกะคือ ส้มหมูต่อน


ส่วนผสมส้มต่อนหมู
- เนื้อหมูติดมันจักหน่อย กิโลหนึ่ง
- ข้าวเจ้านึ่งปล่อยให้เย็น สองทัพพี
- กระเทียม ขีดหนึ่ง
- เกลือ สองช้อนโต๊ะ
- ผงนัว (ผงปรุงรส) 1ช้อนโต๊ะ กับ น้ำตาลจักช้อนชาหนึ่ง













วิธีทำกะตามนี้ล่ะ

หั่นเนื้อหมูเป็นต่อน คันสับกะคงบ่เอิ้นว่า ส้มต่อน แม่นบ่ ต่อนบ่ต้องหนาดอก

สิได้ส้มเร็วๆ เอากระเทียมมาแกะเปลือกออกแล้วตำเตรียมเอาไว้







มาหมูลงชาม เอาข้าวเจ้าสุกมาใส่พร้อมกระเทียม เกลือ ผงนัว น้ำตาล

คั้นกับเนื้อหมูให้มันเข้ากัน






จากนั้นก็นำเนื้อหมูที่ผสมแล้ว ใส่ถุงไล่ลมออกให้มันหมด

เอาไปแช่ตู้เย็น 3มื้อ




กะแกะเอาออกมาทอดกินกับข้าวเหนียว








แซ่บอีหลีเด้  แห่งกินกับตำบักหุ่ง มันเข้ากันคักเข้ากันแน่