เข้าหนมเส้น

เป๋นของกิ๋นตี้มักแถมอย่างหนึ้ง เข้าหนมเส้น ไปตี้ไหนขอหื้อมีเข้าหนมเส้นเต๊อะ
ตึงบ่ถามหาอย่างอื่นละ ถ้าอยู่ต่างบ้านต่างเมืองบ่มีขาย ... ยะใด
ง่ายแง๊บ ... ไปยะใยล่ะ ... แป๋งกิ๋นคนเดียวก่ะ ล๊ำลำ ... มันบ่มีหยังยากของลุ่มต๋า
เพียงแต่ว่าน้ำเข้าหนมเส้นคัวมันนัก ย่อยตี๋นย่อยมือ แต่ถ้าแล้วเมื่อใดลำเมื่อนั้น
เคล็ดลับง่ายๆ ต๋ำพริกหื้อเหลือกๆ หื้อเครื่องแก๋งแหลวแตวเป๋นเนื้อเดวกั๋นจะลำ

ส่วนผะกอบ

๑.    เข้าหนมเส้น
๒.    จิ้นหมูติดมันเหียหน้อยลาบหยาบ
๓.    ซี่โครงหมู กระดูกหมู ต้มแป๋งน้ำซุบ
๔.    จิ้นไก่เมืองลาบหยาบ
๕.    เลือดไก่ต้ม ซอยมอกแก่นไฮโล    
๖.    บ่ะเขือส้ม ผ่าเกิ่ง
๗.    ดอกงิ้วแห้ง เอาเก๋สรมันออกแล้วแจ้น้ำหื้อยมๆ
๘.    ถั่วเน่า
๙.    น้ำมันหมู กาว่า น้ำมันถั่วเน่าค็ได้

พริกแก๋ง ต๋ำหื้อมันเหลือก แก๋นในพริกจะไปหื้อได้เหลือซาก

๑.    พริกแห้ง
๒.    หอมเตียม
๓.    หอมบั่ว
๔.    กะปิ
๕.    เกลื๋อ
๖.    จั๊กไค
๗.    เข้าหมิ้น
๘.    ฮากหอมป้อม

ผักกับ เครื่องแอม

๑.    ผักบุ้งลวก
๒.    ผักหนอง
๓.    พริกดองน้ำปล๋า
๔.    พริกแห้งคั่ว
๕.    ผักกาดดอง
๖.    ถั่วงอก สดค็ได้ ลวกค็ได้
๗.    ผักป้อม
๘.    ใบหอม
๙.    หอมเตียวคั่ว

เอาเป๋นว่ามักผักอันใดเอาอันนั้น กิ๋นได้หมด

ยะอย่างใดหื้อลำ

๑.    ต้มน้ำมอกมันเดือดเดือด ใส่ซี่โครงหมู กระดูกหมูต้มแป๋งน้ำซุปเคี่ยวเมินๆ
๒.    จ่าวเครื่องแก๋งกับน้ำมัน หื้อหอมๆ
๓.    เอาจิ้นหมู จิ้นไก่ ลงคั่วตวยกั๋น หื้อจิ้นไก้ จิ้นหมูสุก
๔.    ใส่เครื่องแก๋งตี้คั่วกับหมู กับไก่ ลงในน้ำซุป แล้วต้มต่อจ๋นเดือด ใส่ดอกงิ้ว ต้มต่อ
๕.    ใส่เลือดไก่
๖.    ใส่ม่ะเขือส้ม
๗.    ตั้งไฟต่อรอจ๋นเลือดกับบ่ะเขือส้มสุก

จากนั้นยะใดต่อ .... กิ๋นก่ะเจ้าป้อ 555 ฮิ้ววววววส์  มากิ๋นตวยกั๋นบ๋ออออออ ^^