ตอนที่ 54 อาหารอีสาน

เมนูที่ 42  หมกอีสานทะเล หมกทะเลอีสาน










ก่อนอื่นต้องขอบอกเอาไว้ก่อนเด้อครับว่าบักอ้ายมักแนวกินทะเลหล๊ายหลาย  

อีปู กุ้ง หอย มักคักมักแน่ ย่อนว่าตอนเป็นเด็กน้อยบ่เคยได้กินคือไทบ้านไทเมืองเพิ่น

พอใหญ่เป็นบ่าวกะเคยหาซื้อมากินท่อที่สิกินได้


ตอนนี้กะตอนที่ 54 แล้ว บักอ้ายกะเลยอยากสิลองเอาแนวกินสดๆจากทะเล

มาเฮ็ดเป็นเมนูตามแบบฉบับของคนอีสานบ้านเฮา บักอ้ายลองเฮ็ดกินเบิ่งแล้ว

มันกะเข้าท่าดีอยู่เด้ กะเลยขอเอามาฝากพ่อแม่พี่น้อง

ไผ๋อยากลองกะลองเอาไปเฮ็ดเบิ่งเด้อครับ

บักอ้ายขอให้ชื่อว่า หมกอีสานทะเล หมกทะเลอีสาน

สิแซ่บท่อราคาคุยบ่ กะตามมาเบิ่งเด้อครับผม



ส่วนผสมหลักของเมนูทั้งหมดมีตามนี้เด้อครับ
อีกะปูม้า 1 ตัว ตัวหนึ่งกะประมาณ 3 ขีด
กุ้งขาว 2 ขีด
ปลาหมึกกล้วย  2 ขีด
เห็ดขอนขาว 3 ขีด
กะหล่ำปลี 2 ขีด
ผักชีลาว 5 ต้น
ผงอีตู่ ถ้วยหนึ่ง
ต้นหอม 4 ต้นใหญ่ๆ
ใบตอง สำหรับห่อหมก









ส่วนผสมบักพริกแกง
ข่า
ตะไคร้
ใบบักกรูด
หอมแดง
กระเทียม
บักพริกสด
บักพริกแห้ง
ข้าวเหนียวแช่น้ำ
เกลือ








ส่วนเครื่องปรุงกะมีดังนี้
น้ำปลา 1 ช้อนโต๊ะ
น้ำตาลทราย ครึ่งช้อนโต๊ะ
น้ำปลาร้า 1 ช้อนโต๊ะ
น้ำมันหอย 2 ช้อนโต๊ะ










มาเบิ่งวิธีเฮ็ดกันเลยครับผม

เริ่มจากเอาปูม้า กุ้ง ปลาหมึกไปล้างน้ำให้สะอาด แล้วเอาปลาหมึกมาหั่น

เป็นต่อนพอดีคำ กุ้งเอามาแกะผ่าเอาเส้นหลังออก ส่วนปูม้ากะเอามาตัดเอา

หนามแหลมๆมันออกแล้วค่อยหั่นเป็นต่อนพอดีคำคือกัน

แล้วค่อยเอาไปล้างน้ำอีกเที่ยหนึ่ง






เอาผักและส่วนผสมอื่นๆกะเอาไปล้างให้มันสะอาดคือกัน

แล้วเอาเครื่องแกงมาหั่นเตรียมเอาไว้ แล้วค่อยเอามาตำผสมกับเกลือ

ได้พริกแกง ตักออกมาพักเอาไว้ท่าสาก่อน







เอาใบตองมาฉีก แล้วเอาไปนึ่งให้มันนิ่ม ก่อนจั่งเอามาใช้ผ้าสะอาดเช็ด แล้วตัดเอาไว้ท่า






เอาผักอีตู่มาเด็ดเอาแต่ใบ ผักชีลาว  ต้นหอม หั่นเป็นต่อนประมาณ 1 นิ้ว

กะหล่ำปลีเอาหั่นเป็นเส้นๆ ส่วนเห็ดกะเด็ดเอาฮากดำๆมันออก





เอาข้าวเหนียวแช่น้ำมาตำให้แหลก






แล้วเอาปู กุ้ง ปลาหมึก ที่เฮาล้างเอาไว้ ใส่ลงไปไปในชาม

ใส่พริกแกง น้ำมันหอย น้ำปลา น้ำตาล และน้ำปลาร้า ลงไป







ใส่ข้าวเบือลงไป ใช้ทัพพีคนให้มันเข้ากัน

แล้วจั่งเติม ผักชีลาว ผักอีตู่ เห็ดขอน กะหล่ำปลี แล้วกะต้นหอมลงไป

ใช้ทัพพีคลุกให้เข้ากันอีกเทื่อ










ตักต่อนหมกของเฮาลงไปในใบตองที่จะใช้ห่อ รวบห่อใบตอง

แล้วใช้ที่เย็บกระดาษติดให้มันเรียบร้อย อีหลีแล้วควรสิใช้ไม้กลัด

แต่บักอ้ายว่าใช้ที่ติดกระดาษง่ายกว่าเด้




เอาห่อหมกทะเลอีสานใส่ในหม้อเตรียมนึ่ง

คันมักแบบหมกไฟกะได้คือกัน แต่บักอ้ายขี้คร้านดังไฟ กะเลยนึ่งเอา

เอาหมกขึ้นไปนึ่ง นึ่งประมาณ  30 นาที กะสุกพร้อมกินได้แล้วล่ะครับ





หน้าตากะสิออกมาประมาณนี้เด้อครับพ่อแม่พี่น้อง

จ้ำกับข้าวเหนียว มันคือแซ่บคักแซ่บแน่แท้นอ บัดที่นี้แม้