ตอนที่ 41 อาหารอีสาน

เมนูที่ 33 อ่อมตับไก่






หลังจากเป๋ไปหลายเมนูยุเนาะ บ่เข้าข่ายแนวกินอีสานบ้านเฮา

สุดท้ายบักอ้ายกะต้องวกกลับมา เข้าเมนูอีสานบ้านเฮาจนได้

แต่ขอปรับเปลี่ยนใหม่ แน่จักหน่อย

เอาเป็นตอนขึ้นก่อน เมนูค่อยตามมา เป็นเมนูแนวกินคนอีสานๆแท้

เมนูที่ 33 สำหรับหลายเมนูที่เคยเขียนแล้ว เมนูได๋ บ่แม่นแนวกินอีสาน

บักอ้ายกะขอตัดออก เข้าใจตรงกันเนาะครับ

สำหรับตอนนี้กะเลยเป็นตอนที่ 41 แล้ว แต่ว่า ใน 41 ตอน

มีแนวกินอีสานเมนูนี้ เป็นเมนูที่ 33 โอเคบ่ครับ




สิเว้าเรื่องน้องหมาให้ฟัง พาน้องหมาไปเฮ็ดหมัน วันนี้หมอนัดไปตรวจแผลพอดี

ผ่านตลาดกะเลยแวะลงมาซื้อ เห็นแม่ค้าขายตับไก่ล้วนๆ

บ่ติดหัวใจหรือว่าเครื่องในอื่นๆ บักอ้ายมักหลายแหลว

ตับไก่นี้ อีหลีแล้วกะมักอยู่ กิน ตับ ๆ ๆ ๆ นี่ (เหอ เหอ)



กะเลยซื้อมาครึ่งโล คันสิเอามาปิ้งกิน มันกะดึกแล้ว ขี้คร้านดังไฟแม้

กะเลยเฮ็ด อ่อมตับไก่ นี่ล่ะ แม่นแนวที่สุดแล้ว




ส่วนผสมกะมี

ตับไก่ ล้วนๆ แต่บ่กวนเด้
ข้าวเหนียวแช่น้ำ (ข้าวเบื่อ)
บวบงู คันใส่บวบหวาน มันเละไป
ผักชีลาว
ต้นหอม
และกะผักอีตู่
แถม น้ำส้มชายชู เอาไว้เอ็ดหยัง ตามมาเบิ่งเอา






บัดนี้ส่วนของพริกแกง
พริกแห้งกับพริกสด อย่างละครึ่ง คุเทื่อสิเห็นบักอ้ายเฮ็ดแบบนี้ กะเพราะว่ารสชาติมันสิได้ดีขึ้น อีหลีเด้
กระเทียม
หอมแดง
ตะไคร้
ข่า



ส่วนเครื่องปรุงกะมี
ปลาร้า
เกลือ
น้ำปลา
น้ำตาล









และมาฮอดวิธีเฮ็ด

เอาตับไก่ไปล้างทำความสะอาดหลายๆน้ำ ตับไก่นี่มันคาว เฮาต้องเฮ็ดให้เป็น

จั่งสิแซ่บ บักอ้ายมีเคล็ดลับ คือเอาตับไก่ล้างแล้วแช่กับน้ำส้มสายชูจักช้อนโต๊ะหนึ่ง

เอาผสมน้ำเด้อ แช่เอาไว้ 10 นาที ค่อยล้างออก แค่นี้ รับรองกลิ่นคาวหายหมดโลด

ครบเวลาแล้วกะเอาตับไก่ไปล้างให้เรียบร้อย พักเอาไว้ท่า






นำผักต่างๆไปล้างแล้วเอามาหั่นให้เรียบร้อย ท่าไว้คือกันเนาะสู





พร้อมกับเอาข้าวเหนียวที่เฮาแช่น้ำไว้ มาตำให้แหลก






ค่อยหันมาจัดการเครื่องแกง เอาคุอย่างมาซอย

แล้วค่อยตำให้มันแหลก  ตักออกมาจากครก











ตั้งกระทะให้มันร้อน ใส่น้ำนำเด้อ เอาเครื่องแกง ใส่ลงไป ท่าจนน้ำเดือดจัดๆเลยเด้

ค่อยเอาตับใส่ลงไป อย่าฟ้าวคน ท่าจนตับเปลี่ยนสี  ค่อยคน ไป ใส่บักบวบงูก่อน

ท่าให้น้ำเดือดอีกเทื่อ ปรุงรสโลด ใส่ น้ำปลา น้ำตาล น้ำปลาร้า ชิมเบิ่ง

พอรสชาติถึกใจแล้ว กะค่อยใส่ข้าวเบื่อที่เฮาตำเอาไว้ เพิ่มความเข้มข้นของน้ำแกง

พอเดือดเทื่อสุดท้าย ใส่ผักชีลาว ผักอีตู่ ต้นหอม สุกแล้วกะยกลง







ตักใส่ถ้วยโลด


เป็นจั่งได๋ อยากกินบ่ อ่อมตับไก่ ของ บักอ้าย