แนวกินอีสานบ้านเฮา 100 เมนู ตอนที่ 7 เมนูที่  7

บักอ้ายขอนำเสนอตำบักถั่วผักรวมกุ้งอบเกลือ กินแล้วบ่อ้วนเด้อนาง







เฮ็ดแนวกินดุๆ พุงบักอ้ายกะเริ่มออกมาเนาะสู เฮ็ดจั่งไดดีล่ะบัดนี้
เอ้า หันมากิน แนวกินที่มันบ่อ้วนกันแน่
นั่นกะคือ ตำบักถั่ว คันสิตำ สื่อๆ มันกะสิบ่เท่ห์เนาะ
คันจั่งสั่นกะ มากินแบบ ฟิวชั่นฟู้ด พะนะ





มาเบิ่งส่วนผสมกันเนาะ
มันกะบ่ได้ยากอีหยังดอก กะคือตำบักถั่วทั่วไปนี่ล่ะ
บักถั่ว
บักนาว
น้ำบักขามเปียก
ผักขา(ชะอม)
ผักกาดขาว
ผักกาดฮิ่น
หมากแข้ง
ผักก้านจอง
ผักชีลาว
หมากพริก
กะเทียม
น้ำปลาร้า
บักเขือเทศราชินี ใช้แทนน้ำตาลนำเนาะ เพราะว่าอ้ายบ่ใส่น้ำตาล
น้ำปลา
กุ้ง
และกะ เกลือ












บัดนี้กะมาลงมือย่าวกันโลด
มาเฮ็ดกุ้งอบเกลือก่อน (ขอโทษหลายๆเด้ บ่ได้ถ่ายรูปไว้)
เอากุ้งใส่กะทะ แล้วกะใส่เกลือ ปิดฝาหม้อ
ท่าจนกว่าน้ำจากกุ้งสิระเหยหมด เป็นอันใช้ได้  
ซั่มนี้ละ ง่ายบ่







แล้วเฮากะมาตำบักถั่ว
ขั้นตอนกะง่ายๆคือตำบักถั่วทั่วไปเนาะ
ตำพริกกับกะเทียมให้แหลก หักบักถั่วใส่ อย่าหั่นเด้ มันบ่แซบ
ตำให้มันละเอียด





ใส่บักแข้ง(บักเขือพวง สิเฮ็ดให้รสชาติแซบขึ้น)ตำต่อให้บักแข้งแตก
แล้วๆกะใส่บักเขือเทศราชินี บิมันก่อน มันสิหวาน จั่งบ่ต้องให้น้ำตาล
หลังจากนั้นกะค่อยปรุงรส
ใส่ น้ำปลา น้ำปลาร้า น้ำบักนาว น้ำบักขามเปียก
ตำให้เข้าเครื่อง






สุดท้ายกะใส่ผักก้านจอง ผักกาดฮิ่น ผักกาดขาว ผักชีลาว และกะผักขาลงไป
อย่าตำแฮง ผักสิซ้ำ
แล้วๆกะตักใส่จาน
เอากุ้งอบเกลือมาเรียง
เรียบร้อย










กินกับผักแกล้ม
แล้วกะขนมเส้น
เผอิญว่าเมื่อว่านเฮ็ดแกงไตปลากิน มันเหลือ กะเลยเอามากินนำกัน
ทั้งแซ่บ ทั้งบ่อ้วน แจแม่นคัก
เอ้า มากินนำบักอ้ายเร็ว






จบแล้วครับ