แก๋งดอกต้างหลวง

ดอกต้างหลวง มีนักตางล้านนาบ้านข้าเจ้า
เป๋นต้นไม้ตี้หุมอยู่ต๋ามดอยตี้จุ่ม บ่ะปอหุมแดดเต้าใด
กันถ้าจะปลูกยังบ้านจองหอเฮือน หื้อปลูกปื๊นเก๊าไม้ใหญ่ตี้มีฮ่มมีเงา
ต้นดอกต้างหลวงใบงาม ออกดอกเป๋นจ้อสีเหลืองอ่อน
จ้อหนึ้งจะมีดอกเป๋นปุ๊ก ปุ๊กไหน ๓๐-๕๐ ดอก
ต้างหลวงจะออกดอกหน้าหนาวไปจ๋นเถิงหน้าฮ้อน คือ ปล๋ายเดือนกุมภาพันธ์ ถึงเดือนเมษายน
ถ้าหน้าหนาวไผมีโอกาสได้ไปแอ่วเจียงใหม่ ลองไปเตียวแอ่วตี้กาดหลวงผ่อเทิอะ
แม่ก๊าเปิ้นตึงเอามาขายเป๋นตี้เป๋นตี้ วางกั๋นจ๋อกป๋อกแจ๋กแป๋ก

เมื่อตะก่อนต้นต้างหลวง เกยมีอยู่นัก แต่บ่ะเดี่ยวนี้ไคร่เซาะหายากนักแก
เนื่องจากป่าไม้โดนถางแป๋งไฮ่เข้าโพดส่งบริษัทหม้อนะฮก
ป่าไม่เจียงใหม่ เมืองแป้ เมืองน่าน ละกอน เจียงฮาย พะยาว แม่ฮ่องสอน สิ๋บหายหมด
ย้อนบริษัทหม้อนะฮกไปส่งเสริมหื้อจาวบ้านตัดไม้ใหญ่ไม้หลวงแป๋งไฮ่
แต่ตี้เจียงใหม่ยังมีหื้อหัน มัดซาวบาท มัดหนึ้งกะมอกปอแก๋งได้สักถ้วย
คนล้านนาเอาดอกต้างมาหนึ้งกิ๋นกับนํ้าพริก ใส่แก๋งแค แก๋งเป๋าะกับปลี๋กล้วย กันบ่าอั้นกะแก๋งใส่ปล๋าปลาแห้งดาดๆ

แก๋งดอกต้างหลวง ยะชาใด ???

ได้ดอกต้างหลวงมาแล้ว หื้อล้างน้ำหมดเกียมเอาไว้
ปล๋าแห้ง หื้อไจ๊ปล๋าแห้งปล๋าหลิม จิ้นมันจะแหน้รกว่าปล๋าแห้งปล๋าดุก กาว่า ปล๋าก๋ด

น้ำพริกแก๋ง และ ขั้นต๋อนก๋ารแกงดอกต้างหลวง

พริกแห้ง เกลื๋อ หอมเตียม หอมบั่ว หอมแดง กะปิ ต๋ำหื้อเหลือกแล้วลงขั้วน้ำมันหื้อหอม
เตื่อมน้ำลงไปต้มหื้อปอเดือด ใส่ปล๋าแห้ง บ่ะเขือส้ม
ตวยด้วยดอกต้าง เหยาะน้ำปล๋าซักหน้อย ละไว้ซักกำรอหื้อดอกต้างหลวงสุกน้ำหม้อแก๋งมอกปอ
ใส่ผักแค ป๋ดหม้อแก๋งลงตักใส่ถ้วย แก๋งดอกต้างจะออกขมหน้อยๆแต่ค็ลำนักแก

ดอกต้างหลวงเป๋นของกิ๋นตี้มีผะโยจนะ มีเส้นใย เบต้าแคโรทีนและวิตามินซี
เหมาะสำหรับคนเฒ่าคนแก่ คนมีอายุและคนตี้ฮักสุขภาพตังหลาย