4โมงเมื่อแลง ไอ่เกิ้ม บ่าวน้อยวัย15 เลิกโฮงเฮียนมา ปิ๊กมาถึงบ้านก่อก๋ำกระเป๋านักเรียน สะแว๊วลงปื๊นเฮือนดัง 'ปึ้ง' แล้วล่นไปหลังบ้าน พร้อมกับเอิ้น                 'อี่แม่ เปิ้นปิ๊กมาแล้ว มีหยังหื้อกิ๋นพ่อง' อี่ปุ๊ด แม่เฮือน วัย32 กะลัง ลาบจิ้นหมู ในโฮงไฟ ก่อเหลียวมาอู้กับลูกบ่าว "เนี๊ย..อี่แม่กะลังลาบจิ้นหมู หื้อป้อคิงอยู่ ละคิงจะกิ๋นก่อเดียวแม่จะได้เอาไปคั่วหื้อ ละอ่อนบะดีกิ๋นดิบ ขี้ตืกจะนัก เดียวจะขี้ค้านแหม" ได้ยินจะอั้น ไอ่เกิ้มก่อสวนไป "อี่แม่บะเกยได้ยินก๋า วัยก๋ำลังกิ๋นก๋ำลังนอน  ต้องนอนนักๆกิ๋นเยอะๆ เข้าใจ๋ก่ออี่แม่.." อู้จบก่อหว้ายหลังเตียวเข้าบ้านขึ้นห้องไป  กะลังจะก้าวขาขึ้น ขั้นได มีเสียงตวยก้นมา "ก๋านบ้านมีก่อเยี๊ยะหื้อแล้วก่อนเน้อถ้าป้อปิ๊กมาแล้วแม่จะเอิ้นมากิ๋นเข้า" อี่ปุ๊ดเอิ้นใส่ลูกบ่าว  "คร้าบ คุณแม่ตี้ฮัก" คำเกิ้มตอบพร้อมกับปิดปะตู๋ห้องดัง 'ท่ม' ฟั้งเปิด คอมพิวเตอร์ ในห้อง  "อี่น้องคำหล้า จะออนละยังหา กึ๊ดเติงหาโท๊ะ"  ไอ่เกิ้มกึ๊ดในใจ๋ไปตวยยิ้มไปตวย ผ่อหยังผีบ้ายาหมด  ฟั้งกดเม้าท์เข้าเฟสบุ๊ค 'กะลิก' ผ่อหา น้องคำหล้าออนไลน์พอดี หันจะอั้นก่อยิ้มแม๊ะแห๊ะๆ ส่งแชทไปหาสาวหน้อย
                        # น้องคำหล้าคนงามหยั่งนางฟ้า  กึ๊ดเติงหาเวลาอู้ตวยกั๋น
                      บ่อได้แชทกับน้องแค่เกิ่งวัน  เหมือนพระจั๋นตี้มันไร้แสงดาว #
พิมพ์เส๊ดกดส่ง 'ตรึ้ง'  "โค๊ะไขแชทมาโวยแต๊ะโวยว่าก้าหาเปิดนิ"  คำหล้า สาวหน้อยหน้าหมดต๋าใส วัย14 จ่มไปพร้อมกับเปิดผ่อละก่อ "ไอ่เกิ้ม..ฮาว่าละ ส่งอะหยังบ่อฮู้มาแหมละ ก้ายๆๆๆ เฮ้อ เล่นกับมันเหียกำก่อได้ " คำหล้ากึ๊ดในใจ๋ ละก่อตอบแชทไป  
                      # ปากหวานแต้หวานว่าอ้ายคำเกิ้ม  ถ้าน้องเขินตกเก้าอี้เยี๊ยะไดหา
                      ถ้าเป๋นแผลเป๋นไข้เข้าโฮงยา  อ้ายต้องจ่ายก้าฮักษาก้ายาตวย #
'ตรึ้ง' คำหล้าส่งไป
                      # ก้าฮักษาอ้ายขอจ่ายเป๋นความฮัก  มันจะนักมอกไดหื้อฮู้กั๋น
                      มันจะนักเป๋นหมื่นหรือเป๋นปัน   ฮักอ้ายนั้นมีหื้อน้องตลอดไป #
'ตรึ้ง' คำเกิ้มส่งไป
                      # อันความฮักของอ้ายบ่อปอก้า  i phone5ออกมาก่อไข้ได้
                       Msx ksr scoopy i   หรือกระเป๋าถือซักใบ prada ปอ #
'ตรึ้ง' คำหลัาส่งมา
                       # i phone 5 ตี้ร้านมันบ่อหมี  scoopy หลายสีเกินเลือกบ่อไหว
                       ส่วน pradaอ้ายบ่อฮู้ขายตี้ได  บ้านก่อไก๋เมืองเจียงใหม่ยี๊ยะไดดี #
'ตรึ้ง' คำเกิ้มส่งพ่อง
                       # บ่อต้องแต่งมาอู้ดีใกล้  ถ้าซ๊ะตังบ่อมีใจ้ก่อบอกกั๋น
                       ซ๊ะตังหมื่นซ๊ะตังแสนซ๊ะตังปัน  ถ้าบ่อหมีก่ออย่าฝัน unfriend เลย #
'ตรึ้ง'คำหล้าส่ง
                       # กำเดียวก่อนน้องฟังอ้ายอธิบาย  อ้ายก่อต๋ายทั้งเป๋นถ้าน้องหนี
                        ขอเวลาอ้ายซัก3นาที..................................... เอ่อฮานิ น้องunfriend รวด offline #